|
|
| Presse |
Titel: Kerweredd 2005
Merfeller Kerweredd 2005
Wann die Berne worn geernt,
die Quetsche soin entkernt,
im Herbst bei Äppelwoi und Sauerkraut,
so mancher sich die Hoos versaut.
Unn wann´s dann uff St. Gallus geht,
die Merfeller Kerb vor de Düre steht.
Unn so frag isch Eich, was iss dann heit,
wann de Vadder uff die Lader steit ?
Ei Kerb iss heit, Ihr liewe Leit !
Isch hab hier so einiges notiert,
was im Ort so iss passiert.
Unn was do so alles iss gewese,
des will isch Eich in maaner Redd verlese.
Hallo Ihr Leit, isch grüss Eich als Vadder im Jahr ´05,
mit Frack, Zylinder unn schwarze Strümpf.
Bin im Amt gar lange schon,
des iss bei uns so Tradition.
Die Arbeit iss geschafft, jetzt kimmt des Vergnüsche,
mir lasse es krache, da tu isch net lüsche.
Denn isch unn die Borsch an meiner Seite,
wern mit Eich feiern uff de Gass, im Saal unn in de Kneipe.
Nun schaut Eich an de Kerwebaum!
Die Kerb als Vadder fer mich en Traum!
Drum gönnt Eich en Schoppe, stoßt mit mir ooh,
denn unser Merfeller Kerb iss wirrer do.
Unn iss de Schoppe erst in de Rinne,
dann wern mer all zusamme singe.
Unn was mer singe, des iss doch kloar:
Ei, die Merfeller Kerb iss wirrer do!!!
Lied: Kerwemarsch
An Kerb da gibt´s so manche Sache,
da kann mer aach schee drüber lache.
Letzt Joahr am Kerwemoondaach war oaner beim Arzt,
der Borsch hatte gar nix, der war einfach nur schwarz.
Denn was willste am Kerwemoondaach inn de Schule soi,
da machste Urlaub uffn geele Schoi.
Der Borsch dann zum Dokter, da werste verrickt,
hamse den Kerl nach Gere geschickt.
De Dokter in Gere war ziemlich verdutzt.
Unn fragte: “Hawwe Sie e Flasch Wodka verputzt?“
„Naa, isch bin nur e bisje merb,
ei mir hawwe bei uns doch in Merfelle Kerb!“
Doch uffemol denkt sich de Dokter des kann doch net soi,
da iss doch was mim Blindarm net ganz in de Roi.
„Nix da, isch will uff die Kerb unn nur noch nach Haus!“
Doch es half alles nix, der Blinddarm sollt raus.
Zurück uff die Kerb unn bei der Diagnose,
da muss mer doch gleich en Schoppe bloose.
So manch ein Äppler ging dann noch rein,
doch dann brach er zusamme unn wollt nur noch heim.
Lied: Uff de Merfeller Kerb ...
Im Waldschwimmbad, da gibt es jetzt saftige Oitrittspreise,
dadefier im Geschezuch kerzere Öffnungszeite.
Da wollt isch mondaachs frieh zum Schwimme gehe,
musst isch lange vor verschlossene Türe stehe.
Isch dann rinn. Wollt noch dusche, wies sisch gehört,
da war isch glei wirrer forschtbar empört.
Isch stand unner de Dusch, freute misch uffs große Becke,
doch dann konnte misch all ma am Bobbes lecke.
Die Dusch war viel zu kalt unn de Hebel stand uff warm,
da hab isch mein Krempel gepackt, bin hoamgefahrn.
Lied: Ja da könnt isch misch so forschtbar...
Im Februar hat mers in ganz Deutschland vernomme,
de George Bush, der iss nach Meenz gekomme.
Unn vorher kam schon auf sein Geheiß,
die Frau Condoleezza Rice.
Mer kennt se aach als Whoophi-Goldberg-Imitat,
das schon mal um gutes Wetter bat.
Uff de Gass, sogar im Wald Poliziste worn,
weje de Landung von de Air-Force-One.
Unn im ganze Rhein-Main Gebiet Chaos und Stau,
nur weje dem Ami unn soiner Frau.
Unn als de Schorsch dann kam nach Rheinland-Pfalz,
da hatte die Meenzer en riese Hals.
Denn die arme Meenzer wurden ganz unverdrosse,
von de Polizei so mir nix dir nix weggeschlosse.
Die arme Meenzer durfte noch net emol scheisse,
konntest de doch net doi Fenster uffreiße.
Denn die Fenster unn die Türn warn zu,
weil son Präsident, der brauch soi Ruh.
Sogar die Kanaldeckel, die warn verrieschelt,
damit koaner den Kerl verbrieschelt.
Als er dann weg war, gab es Jubelgeschrei,
de Schorsch war fort, unn tschüss, goodbye.
Lied: Quetschekuche wolln mer backe...
Mir ham en Ehrenkerweborsch, en liebe Kerl,
der trinkt halt manchmal e bisje schnell.
Er geht gern zu de Löwe zum Eishockey,
des macht em halt Spass unn des iss aach ok.
Er fuhr mit nem Trupp e Auswärtsspiel gucke
unn musst halt wirrer so forschtbar viel schlucke.
Abends in Regensburg wollt er uffs Zimmer dann gehe,
denn er konnt ja nemmer so rischtisch stehe.
Awwer en paar annern wollte noch mal enaus uff die Gass,
wollte noch oaner trinke und oifach ihrn Spass.
Er denkt sich was solls, geht noch mal mit
unn unne uff de Gass, merkt oaner de Hit.
Da steht der Simbel uff de Strooss, iss total stramm
unn hat schon sein Schlafanzugshöschen an!
Dem Kerl wars egal unn aach net zu dumm,
er lief noch Stunden im Schlafanzug rum.
Viele Leit im Ort, dene packte de Zorn,
als die erste Bannwaldbeem gerodet worn.
Scheene, grosse Beeme all,
weje de A-380-Hall.
Bin oft gefragt worn, ob isch in de Redd zu dem Thema was sage,
isch muss schon sage, hab da koa gut Gefiehl im Mage.
Wenn isch jetzt saage, ob ischs nun gut find, odder aach net,
ei da wär isch ja de größte Depp.
Denn es iss doch klar, des iss en große Konflikt,
da wär ne Äußerung recht ungeschickt.
Unn isch sags Eich nochma unn net ohne Grund:
Die Kerb steht heit im Mittelpunkt!
Drum schenkt mir ein vom kühle Nass,
ei son Fässchen Bier, des macht mer Spass.
-Prost-
Denn de Kerwesamstag, des iss doch kloar,
iss de scheenste Feierdaach im ganze Joahr.
Lied: Hola, hie, hola hie, hola ho...
Die Redd iss beinoh schon rum unn glei bin isch still,
doch jetzt kimmt de Teil, den man in Walldorf net will.
An Kerb da kann soviel passiern,
da muss mer hin und widder de Baum kontrolliern.
Aach dene Wallderffer Borsch sinn diese Pflichten bekannt,
so schauten sie nach ihrem Baum, der natierlich noch stand.
Sie sahen nach oben, befanden alles fer gut,
die merkten ja gar net, dass kein Kranz hänge dut.
Die hams net geschnallt, die hams net kapiert,
unn ruckzuck sinn mer mit dene ihrn Kranz im Zelt oimarschiert.
Na unn was dann passierte des war doch klar,
als mer uns Merfeller im Zeltsche dann sah.
Im Zelt vernahm man ein lautstarkes Raunen
unn die Hare-Gesellschaft war mächtisch am staunen.
Bei dene Heizeelpreise, ihr Wallderffer Borsch- nehmt Eich in Acht,
da werd aus Eierm Beemsche nächst Woch Brennholz gemacht.
Lied: Auswärtskerb in Walldorf
Nachdem in Walldorf schon lang des Fachmarktzentrum steht,
es aach bei uns mim Einkaafe uffwärts geht.
Doch musste bei uns laafe bis ganz hinnehee,
dun dir beim Oikaafe die Fiess ganz schee weh.
Doch während man sich bei uns von Qualität sehr viel verspricht,
sinn se in Walldorf net so wählerisch.
Denn mir in Merfelle dun ganz fürstlich schlemme.
während die Haare nur fluchen und flenne.
Die hole aus de Zoohandlung paletteweis raus
Vogelfutter, Hundeknochen und Katzeschmaus.
Unn was kommt dann fer gewöhnlich in Walldorf uffn Tisch?
Ei, des ist Katzefutter mit Geschmacksrichtung Fisch!
Lied: Mörfelden iss ne scheene Stadt...
De Kerwetanz letzt Joahr, war ne Katastroof,
ei da war ja iwwerhaapt nix loos.
Mir wollte mit allen feiern, tanze und so,
doch leider war von Eich ja niemand do.
Drum forder ich Eich hiermit auf unn feiert dies Joahr rischdisch,
denn unser aller Kerb, die iss so forschtbar wischdisch.
Geht in die Beitze, tut feiern, löscht Eiern Dorscht,
unn was Ihr da trinkt des iss mer worscht.
Gebt es Brauchtum an die Kinner weiter,
erzählt vom Vadder, von de Redd und von de Leiter.
Unn am Kerwemoondach muss es wirrer so sein,
da bleibt mer von de Arbeit en Tag mal daheim.
Unn tut mit de Kinner iwwer de Kerweplatz maschiern,
denn mir derffe unser Kerb doch net verliern.
Spruch: Unn die Merfeller Kerb sie lebe hoch...
Zudem lade mir heit alle ein,
ins Berjerhaus, in unser Heim.
Denn mir hawwe dies Joahr, keine Frage,
zur Kerwedisco Eich gelade.
Denkt emol net an die Altagssorje,
geht liwwer feiern bis zum Morje.
Ich lad Eich all zum Feiern oi,
geht uff die Kerb, denn so muß des soi.
-Prost-
Ihr liewe Leit die Redd iss aus,
schnappt Eich e Bier, die Wutz laßt raus.
Isch wünsche Eich, unn des iss keine Frage,
aach in diesem Joahr, wirrer scheene Kerwedaache.
Die Merfeller Kerb, Ihr liewe Leit,
die beginnt jetzt, hier, unn heit.
Drum singe mer, unn des iss kloar:
„Die Merfeller Kerb is do...!“
Merfeller Kerweborsch 2005
Kerwevadder: Marko „Kossi“ Kossmann
Beivadder: Falk Fleischer
Marcel „Ambrosius“ Ambrosch
Sebastian „Eichhörnsche“ Cornels
Boris Deckelmann
Stefan Ernst
Andreas „Gerdi“ Gehrke
Florian „Prof.“ Grimm
Sven „Gunde“ Janz
Sebastian „Fiddisch“ Jörges
Christian Küchler
Christoph Lorenz
Marcel „Niffler“ Neufeld
Sascha „Lumbi“ Riess
Christian Sensche (Fahneträscher 2005)
Holger „Tufte“ Sandner
Paul „Pauletta“ Schulmeyer
Timo „Tetzi“ Telz
Christian „Stinky“ Wolf
Daniel „Gaaßebock“ Wolf
Verfasst am: 15.10.2005 |
|
|
| Kerweborsch
aktuell: |
| Letzte Änderung: |
04.09.2010
|
| Nächste Kerb: |
15. bis 19. Oktober 2010
|
| Kerwevadder 2010 |
Christoph Geiss
|
|
