|
|
| Presse |
Titel: Kerweredd 2006
Merfeller Kerweredd 2006
(verlesen von Kerwevadder 2006, Falk Fleischer)
Wann die Berne worn geernt,
die Quetsche soin entkernt,
im Herbst bei Äppelwoi und Sauerkraut,
so mancher sich die Hoos versaut.
Unn wann´s dann uff St. Gallus geht,
die Merfeller Kerb vor de Düre steht.
Unn so frag isch Eich, was iss dann heit,
wann de Vadder uff die Lader steit ?
Ei Kerb iss heit, Ihr liewe Leit !
Isch hab hier so einiges notiert,
was im Ort so iss passiert.
Unn was do so alles iss gewese,
des will isch Eich in maaner Redd verlese.
Die Welt zu Gast- wir laden ein,
die Merfeller Kerb iss hier deheim!!!
De Umzug war lang, doch isch bin frisch gestärkt,
drum fraach isch ins Volk: Wem iss die Kerb?
Alle: Unser!...
Isch begrüß Eich all mit null Promille,
denn isch brauch koan Schnaps unn aach kaa Pille.
Isch bin de Vadder ohne Alk,
unn heisse tu isch Fleischers, Falk.
Drum trinkt Euern Schoppe und holt euch de Kick
unn isch behalt derweil de Iwwerblick.
Alle: Unn unsern Kerwevadder lebe hoch!
Wie jedes Joahr so aach dies Joahr wieder,
gibt’s bei de Redd aach scheene Lieder.
Desteweje, unn um uns oizustimme,
soll jetzt de Kerwemarsch erklinge.
Lied: Kerwemarsch
Aach bei uns im Ort derffe die Originale net fehle,
sonst hätt mer hier rein gar nix zu verzähle.
So en Kerl mit Mantel unn mit Hut,
iss hier immer für ne Story gut.
Doch über den will ich jetzt hier net länger schwätze,
ich möcht uff nen ganz annern hier heut setze.
En Alt-Kerweborsch hat doch jedes Joahr Schwein,
der schaffts widder unn widder in die Redd hinein.
Der war mit soine ältere Herrn uff Kerwemontags-Tour,
unn es war spät owens schon fast 11 Uhr.
Müde nach der langen Sause,
gelangte man zur Keglerklause.
Unn der Mensch schon kerwe-erprobt,
hat sich dort noch mol so rischdisch ausgetobt.
Ihm war in de Klause dann wohl zuviel Gewühle,
drum nahm er sich ne handvoll Stühle,
unn baute sich in seinem Schlummerwahn,
soi Schlafstatt uff de Keschelbahn.
Do war es ruhig und aach schee dunkel,
dort war er sicher vor dem Rumgeschunkel.
Nur was er dadebei so gar net bedacht,
dass koaner iwwer soine Träume wacht.
Kein Mensch hatte es gerafft,
was der Kerl da hinne schafft.
Unn übers feiern, trinke, esse,
hat mer ihn dann dort vergesse.
Als er dann mojens aus seinem Schlaf erwachte,
unn im Dunkle geje Glastüren krachte,
dacht sich die gute Lori Dammel
- isch muss doch mal gucke nach dem bös Gerammel.
Sie ging runner unn machte erst mal Licht,
unn traute ihren Augen nicht.
Da sagte de Kerl ganz schüchtern unn zahm,
„Liebe Frau Dammel, isch glaab isch muss haam!
Lied: Uff de Merfeller Kerb um halb eins!
Im Sommer kame mir all ins Staune,
denn ganz Deutschland war in Fußballlaune.
Unn weil unser Team so offensiv nach vorne spielte,
die ganz Nation schon uff de World-Cup schielte.
Am Dalles traf man sich spontan,
unn schwenkte stolz die Deutschlandfahn.
Als die Stimmung langsam überschäumte,
unn werklisch jeder dann vom Titel träumte,
gings geje die Italiener leider in die Hose,
und des trotz Lehmann, Ballack unn de Klose.
Trotzdem war die WM fer uns en riese Erfolg,
an viele Autos unn Häusscher strahlte Schwarz, Rot unn Gold.
So entdeckten viele ihre Liebe zum Ball unn zum Vaterland,
unn mal ehrlich- Patriotismus des iss doch koa Schand.
Unn in vier Jahren, ihr Leit des iss doch ganz klar,
wern wir Weltmeister in Südafrika!!!
Lied: 54, 74, 90, 2010…
Jubeln konnt mer zudem noch bei uns in Rhein-Main,
denn die Frankfurt Galaxy holte de World-Bowl heim.
Unn de verdiente Preis, ne Kugel ganz aus Glas,
brachte uns in Düsseldorf ne Menge Spass.
En Borsch von uns, der fand die Hinfahrt schon doll,
denn mir ware kaum da unn de Kerl, der war voll.
Kurzerhand wars dann passiert,
da hatt ihn des Rote Kreuz schon uff ner Trage oikassiert.
Hinein ins Stadion in de erste Stock,
da konnt er erstmal schloofe beim Onkel Doc.
Nach zwei Stunne als er erwachte,
sofort wieder an die Kerweborsch dachte.
Rief:“Ey, Dokter, isch bin wieder fit,
ruf mal de Vadder isch will wieder mit!“
Des Spiel fing grad ooh, als isch den Kerl dann empfange,
da iss der erstmool was esse gegange.
Unn die Moral von der Geschischt:
Biste irschendwann ma richtig merb,
nimms als Trainingslager für die Kerb.
Denn wenn de da beim Umzug meeh säufst als rennst,
dann passiert´s net, dass de bei de Redd dann schon pennst.
Lied: Heute schütte ich mich zu!
Isch muss Eich sage, es iss zwar net schee,
mir ham widder wenischer Geld im Portmonee,
Muss jetzt werklisch hier de Ärjer mal schüren,
denn mir hawwe seit kurzem höhere Abfallgebühren.
Da dust de mache unn tue, dust alles trenne,
am Daach 10 mal zu de Tonne renne,
unn weil mer iss ja e gudes Dier,
hat mer noch e Körbsche fers Altpapier.
Unn jetzt erfährste, des sich des gar net rentiert,
weil mer uff diese Weise zu wenisch Müll produziert.
Unn weil sich des fer die Deponie net dut lohne,
wolln se von uns nur oans: Mehr Kohle! Mehr Kohle.
Lied: Wer soll das bezahlen!
Noch letzt Joahr im September gab´s großes Geschrei,
baute man doch die A380-Werft in de Bannwald enei.
Da ham sich viele mäschdisch uffgerescht,
sogar die Strooß, die wurd dann umverlescht.
Nun sinn die Beem gefällt, de Boden planiert,
doch noch waas koaner was in de Zukunft passiert.
Denn de A380 darf momentan ja nur fliesche,
im Simulator unn im Testbetriebe.
Dann wern ses doch noch aal kapiere,
dass der Fliescher dut im Rohr krepiere.
In Walldorf werd es Lebe jetzt derb,
da sponsert die Fraport jetzt die Kerb.
Unn ganz da vorne iss widder debei,
de Ober-Wallderffer, de Jürgen May.
Der lässt es rhetorisch geje die Fraport krache,
unn lässt sich von dene die Kerb berabbe.
Isch sags frei raus, weil es dut mer stinke,
da dut oaner Wasser predische unn Woi dut er trinke.
Ich fraach mich was los iss in unsrem Nachbarort,
dene Hare laafe wohl die Borsche fort.
Oder wern die Alde langsam mied unn merb,
jedenfalls sucht man dort Nachwuchs fer die Kerb.
Unn um die joahrelange Traditione fortzuführn,
versucht mer se per Steckbrief uffzuspürn.
18 Joahr solln se soi, gesellig und Freude am „Party-zipiern“
des kennt mer ja - doch aach noch Spass am Organisiern?
Ihr Walldorfer Borsch, vielleicht habt ihrs noch net gerafft,
dass der Kerl schon längst bei Eich schafft.
Der iss doch schon joahrelang bei Eich debei,
ei, ihr kennt en doch, de Jürgen May!
Unn seid ihr demnächst immer noch ohne
dann dud den May doch oifach klone!
Die Erde dreht sich immer schneller,
die Breaking-News wern immer greller.
Globalisierung, Gesundheitsreform unn Demographie,
koaner waas, wo führt des noch hie.
Kohl unn Schröder nur noch Geschichte, da iss alles vorbei,
zu Zeiten des Terrors unn weltweit Geschrei.
Die Zeit steht net still, die Zeit, die rennt,
unn machste mal Urlaub haste so manches verpennt.
Im Kanzleramt hockt jetzt die Merkel droi,
unn unsern Papst iss zwar schon älter, awwer trotzdem noch nei.
Nur eines hat hier in Merfelle schon ewig Bestand,
unsern Ort iss fest in Bernhards Hand.
Nur des Rathaus iss hier noch fest manifestiert,
so lang de Bernhard dort dorsch die Gänge stolziert.
Im Ort, waas jeder, ob gross odder klein, ob dünn odder dick,
unsern Bernhard, der zieht sich so langsam zurick.
Isch will jetzt hier net weiter flenne,
will mich nur noch schnell bekenne.
Die Zeit mit Dir war wunnerschee,
denn du bist halt doch e Korrifee.
Isch tu mich meiner Träne aach net schäme,
lieber Bernhard, Du werst uns fehle.
Spruch: Unn unsern Berjermoaster lebe hoch…
Lied: Bernhard Brehl, Bernhard Brehl
Lasst misch noch korz zusammenfasse,
was uns des Joahr denn noch so brachte.
Denn nicht zu vergesse iss der große Zank,
um die Harebacher Lärmschutzwand.
Unn bei uns dut des Rote Kreuz des rote,
gerne mal ihr Autos schrote.
Unn im März ham sich dann doch noch paar verirrt,
ham kumuliert, ham panaschiert.
Unn Becker, Körner unn Schulmeyer sind bis heit die Kandidade,
die wo sich um de Rathaussessel schlaage.
Apropos Rathaus- da sinn se jetzt so unn so net mehr zu trenne,
so derff sich de Herr Urhan jetzt aach noch Stadtrat schenne.
Unn fer die Leit, die wenisch schloofe könne,
seis doch jetzt aach werklisch mal zu gönne,
dass se nun baal erreiche ihr Ziel, des große,
unn kriegen ihr Umgehungsstrooße.
Lied: B44
Denkt emol net an die Altagssorje,
geht liwwer feiern bis zum Morje.
Isch lad Eich all zum Feiern oi,
geht uff die Kerb, denn so muß des soi.
Dann brauch´s oam um die Kerb net bange zu werde,
denn die Merfeller Kerb, die derff net sterbe.
Ihr liewe Leit die Redd iss aus,
schnappt Eich e Bier, die Wutz laßt raus.
Isch wünsche Eich, unn des iss keine Frage,
aach in diesem Joahr, widder scheene Kerwedaache.
Die Merfeller Kerb, Ihr liewe Leit,
die beginnt jetzt, hier, unn heit.
Drum singe mer, unn des iss kloar:
„Die Merfeller Kerb is do...!“
Verfasst am: 14.10.2006 |
|
|
| Kerweborsch
aktuell: |
| Letzte Änderung: |
04.09.2010
|
| Nächste Kerb: |
15. bis 19. Oktober 2010
|
| Kerwevadder 2010 |
Christoph Geiss
|
|
