|
|
| Presse |
Titel: Kerweredd 2007
Kerweredd 2007 (gehalten vom Kerwevadder 2007 Christian Küchler)
Wann die Berne worn geernt,
die Quetsche soin entkernt,
im Herbst bei Äppelwoi und Sauerkraut,
so mancher sich die Hoos versaut.
Unn wann´s dann uff St. Gallus geht,
die Merfeller Kerb vor de Düre steht.
Unn so frag ich Eich, was iss dann heit,
wann de Vadder uff die Lader steit ?
Ei Kerb iss heit, Ihr liewe Leit !
Ich hab hier so einiges notiert,
was im Ort so iss passiert.
Unn was do so alles iss gewese,
des will ich Eich in maaner Redd verlese.
Noch vor’m Joahr stand ich hier debei,
war als Beivadder nur die Nummer zwei.
Doch heit da wer ich ganz galant,
Merfeller Kerwevadder genannt.
Grad deshalb grüß ich Eich putz munter,
hier von maner Lader runter.
Ich hab fer dieses Amt gekämpft unn aach geschwitzt,
es werd ja aach Zeit des ma en Küchler hier sitzt.
Unn wer sich mit mir freit, der stimmt mit mir oh,
die Merfeller Kerb iss wirrer do.
Lied: Kerwemarsch
Bei uns im Verein, da gibt’s en Kerl, uff den iss Verlass,
unn mit dem hat mer aach beim Feiern sein Spass.
Letzt Joahr da passierte es im Suff,
da kriegt er oifach soi Haustür net uff.
Der arme Kerl hat die ganz Noacht gefrorn,
unn so ganz nebebei noch sein Handy verlorn.
Des war am Donnerstagowwend vor Kerb, des waaß ich ganz gut,
weil da war de halbe Verein schon voll bis zum Hut.
Ei bei uns im Verein, da iss es echt schee,
uns tut uffm Haamweg de Kopp halt schon weh.
Lied: Uff de Merfeller Kerb nachts um halb 1
De Sommer war werklisch net doll,
unn die Keller glei zwaa Mal mit Wasser so voll.
Besonners de Giebel durft sisch mäschdisch strecke,
der iss jetzt topfit vom Sandsäck schleppe.
Unn unser Feierwehr war mäschdisch am schaffe,
unn rannte boarfuss dorsch die Gasse.
So pumpten se fleisisch die Keller widder aus,
dodefer sei hier aach mal en große Applaus.
Unn noch was war im Sommer ja kaum zu ertrage,
die ferschterliche Schnookeplage.
Denn mer hatte Rhoischnooke noch unn nöcher,
ei die kame ja aus alle Löcher.
Unn vor allem bei de HR-inline-tour, da stritt mer sich,
wer hat wohl die meiste Schnookestich.
Unn wo die Schnooke sein jetzt endlisch fort,
ei, dann iss wirrer Kerb bei uns im Ort.
-Prost-
In Wiesbaden war mer sich einisch, mer muss was unnernemme,
unn unsern Bernhard ausm Rathaus hier stemme.
So erfand mer im Landtag in greeßter Not,
in öffentliche Heiser des Rauchverbot.
Die Rechnung ging uff, es war vollbracht,
de Bernhard war ausm Konzept gebracht.
Unn so warf er vor lauter Zorn,
wutentbrand soi Flinte ins Korn.
Zur Wahl trat er dann nicht mehr an,
weil mer im Rathaus net mehr raache kann.
Spruch: Unn unser Alt-Berjermoaster er lebe hoch…
Nebbe em Bernhard hat mer den Jürgen May hier so auserkorn,
unn in de Redd selten iwwer ihn e gudes Wort verlorn.
Es sei an dieser Stell erwähnt, er iss ja gar net so verkehrt,
awwer er iss unn blaabt en Wallderffer- unn des iss des was stört.
Lied: Jürgen May, Jürgen May, Du bist net verkehrt,
doch du bist unn blaabst en Wallderffer unn des iss des was stört.
Ich hab zwar dodevon koan blasse Dunst,
awwer 2007 war aach des Joahr der Kunst.
Eine Bäreninvasion im Skulpturenpark,
fer manche Leit wars Kunst unn fer annern nur Quark.
Unn en annern Künstler net frei von Sünden,
wollt glei en ganze Bischof anzünden.
Doch ich bin im Kopp aach net ganz so bescheide,
unn schmeiß mich nach de Redd hier inn en Haufe aus Kreide.
Also, wenn ich hier de Chef wär, dann däts mir reiche,
ich dät den Kerl aus de Programmhefte streiche.
Lied: Ja da könnt ich mich so furchtbar drüber ärgern
Des regionale Dialogforum, des hat getagt,
hat uns den Anti-Lärm-Schutzpakt gebracht.
Nur de Inhalt, der iss wohl recht kompliziert,
dess kaum en Berjer des kapiert.
Drum muss mer des zum Inhalt mache,
was mir alle uffm Herze hawwe.
Denn aach die Fraport muss sich ma bekenne,
unn des Problem beim Name nenne.
Denn schließlich füllt mer sich bei de Fraport die Kasse,
drum solln se uns nachts aach schloofe lasse.
-Prost-
In de Liebknechtschtstrooß hat e Mädsche Träne vergosse,
hat sich in ihrm Auto doch en Feierlöscher ergosse.
In Ihrer Not, tut se schnell bei die Feierwehr renne,
weil se sich dort mit so was austunkenne.
Doch des hat se aach net weiter gebracht,
weil dort hat mer se nur ausgelacht.
Vom Horrortrip ganz ausgelaugt,
is se dann schnell Haam, hat ihrn Karrn ausgesaugt.
De Wert vom Schuuter´s hat sich rischdisch blamiert
der hat´dehaam en Wallderffer oiquatiert
Beim Kerschner da leeft´s jetzt rischdisch doll
da haust im Keller jetzt en Troll.
Unn wer net glaabt an so Märchegestalte
der muss halt emol in de Kneip die Aache uffhalte.
Lied: Quetschekuche wolln mer backe, bei dem
Kerschner in de küch
Jetzt bin schon e bisje heiser,
unn grüss von hier owwe mal die Grewweheiser.
Die konnten es nämlich gar net erwarte,
unn wollte schon vor ner Woch bei uns de Umzuch starte.
So kame se bei uns am Bauhof an, mit alle Borsch uff ner Roll,
unn fragte uns in was fer ne Stroos mer sich uffstelle soll.
Mir sin baal net mehr aus Lache rausgekumme,
denn die hatte sich den Daach extra freigenumme.
Dann soin se awwer recht schnell wirrer abmarschiert,
ei so was bleedes is selbst de Wallderffer noch net passiert.
An die Buwe hier im Ort:
Macht mal was los unn geht aach mal fort!
Unn besorgt Eich all ne schwarze Kapp,
unn geht bei die Kerweborsch, weil da geht was ab!
Unn fängt die Modder dehoam aach des Kreine an,
dann zieht es trotzdem dorsch- no risk no fun!
Denkt emol net an die Altagssorje,
geht liwwer feiern bis zum Morje.
Isch lad Eich all zum Feiern oi,
geht uff die Kerb, denn so muß des soi.
Dann brauch´s oam um die Kerb net bange zu werde,
denn die Merfeller Kerb, die derff net sterbe.
Ihr liewe Leit die Redd iss aus,
schnappt Eich e Bier, die Wutz laßt raus.
Isch wünsche Eich, unn des iss keine Frage,
aach in diesem Joahr, widder scheene Kerwedaache.
Die Merfeller Kerb, Ihr liewe Leit,
die beginnt jetzt, hier, unn heit.
Drum singe mer, unn des iss kloar:
„Die Merfeller Kerb is widder do...!“
Merfeller Kerweborsch 2007
Kerwevadder: Christan Küchler
Beivädder: Sascha Riess Christian Wolf
Marcel Ambrosch
Stefan Ernst
Falk Fleischer
Marcel Gharbi (Fahneträscher 2007)
Sven Janz
Marko Kossmann
Johannes Kunz
Christoph Lorenz
Marcel Neufeld
Marcel Pons
Matthias Rabe
Christian Sensche
Johannes Paul Schulmeyer
Daniel Wolf
Die aktiven Kerweborsch bedanken sich bei allen,
die zum Gelingen der Merfeller Kerb 2007 beigetragen haben.
Verfasst am: 20.10.2007 |
|
|
| Kerweborsch
aktuell: |
| Letzte Änderung: |
04.09.2010
|
| Nächste Kerb: |
15. bis 19. Oktober 2010
|
| Kerwevadder 2010 |
Christoph Geiss
|
|
