Kerweredd 2003


Wann die Berne wor´n geernt,
die Quetsche soin entkernt,
im Herbst bei Äppelwoi und Sauerkraut,
so mancher sich die Hoos versaut.

Unn wann´s dann uff St. Gallus geht,
die Merfeller Kerb vor de Düre steht.
Unn so frag ich Eich, was iss dann heit,
wann de Vadder uff die Lader steit ?

Ei Kerb iss heit, Ihr liewe Leit !

Ich hab hier so einiges notiert,
was im Ort so iss passiert.
Unn was do so alles iss gewese,
des will ich Eich in maaner Redd verlese.



Welch ein Glück, es iss soweit,
endlich wirrer Kerwezeit!!!
Bevor ich jetzt mei Sprüch du kloppe,
trinke mer jetzt erstmool en Schoppe.
Diesen Trunk hier waas ich sehr zu schätze,
ei muß ich doch jetzt lange schwätze.

-Prost-

Ihr Leit, ich hab in diesem Joahr de Frack an,
mein Name ist Cornels- Cornels, Sebastian.
Mein Spitzname sei hier aach genannt,
denn ich bin unner de Borsch als „Eichhörnsche“ bekannt.
Ich bin dankbar, daß man mich zum Vadder kürte,
unn werd deshalb dies Joahr die Borsch durch die Kneipe führe.
Bis Dienstagowwend werd ich net merb,
unn wünsch Eich allen ne scheene Kerb.

Um uns jetzt hier einzustimme,
wern mer jetzt all de Kerwemarsch singe.


Lied: Unn die Merfeller Kerb, unn die Merfeller Kerb iss do...
Ich sitz hier mit der Redd uff´m Schoß,
unn muss Eich sage, es war net viel los.
Hab getüftelt und gebastelt an dieser Redd,
unn sitz nun hier wie de letzte Depp.
Odder fällt Eich vielleicht en Highlight oi?
Dann sagt es mer, ich schreib´s dann enoi .

Mit den Besuchern hat mer sich ganz schee verschätzt,
denn die Langgass war dicht beim historischen Altstadtfest.
Mir Kerweborsch bei die Bewirtung, uff´m Kopf en Dreieckshut,
stande bei iwwer 30 Grad an de Thek, mitte in de Glut.
Der Tag war fer uns Borsch iwwerhaapt ziemlich hart,
denn mir kame mim Bierzappe überhaupt net mehr nach.
Doch des Kulinarische war net so wichdisch, des sag ich mal so,
im Mittelpunkt stanne die Gaukler, die Musik unn Feuershow.
De Höhepunkt, Ihr Leit, ach Gott, ach Gott,
war die Hinrichtung vom Schinderhannes uff´m Schafott.
De Schinderhannes, des iss en arme Tropf,
iwwer die Langass rollte gleich zwoamol soin abgehackte Kopf.
Liewer Schinderhannes, zwei Hinrichtunge, des war kein Scherz:
Sorry, awwer mir Merfeller, mir sinn halt pervers!

Lied: Ja bei uns am Maa...

Hier gibt’s en Geschäftsmann, der hat am Dalles sein Lade,
dort tut er Worscht unn Fleisch verkaafe.
Wer des iss, des brauch ich Eich net zu sage, Ihr seid ja net dumm,
es handelt sich um e rischtisches Merfeller Unikum.
Es war Wochenend unn des Programm hier net schlecht,
denn die Feierwehr blies zum Sommerfest.
Als de Metzgermoaster hörte da iss rischdisch was los,
da dachte er: „Hoffentlisch lange die Wörschtscher bloß.“
Die Sachlage, war scheinbar net klar,
so wählte er verzweifelt die eins-eins-zwaa.
Die Feierwehrleitstell in Gere war fassungslos
unn fragte in Merfelle nach: “Was iss bei Eich dann los?“
Unser Wehr entschuldigte sich, awwer sie kann ja nix defür,
wann unsern Metzger iss e bissje wirr.
Doch de Hit iss, dess hatt sich dann erst rausgestellt,
die Wörschtscher warn goa net bei dem Metzger bestellt.
Ei Herr Metzger, iss Dir mal wirrer bange,
weil die Wörschtscher mal wirrer net lange,
dann tu halt mal e bissje denke
unn net glei mim Notruf alle Türn oirenne.

Unsern Kerwevadder vom letzte Jahr,
der war schon etwas sonderbar.
Mir warn in de Kron unn er hatt e Kerwemädel im Arm,
da paßte ihm wohl was net in de Kram.
Odder es hat ihm oaner ins Gehirn geschisse.
Ei wieso hätt er denn sonst in die Schärp des Mädels gebisse?
Vielleicht hatt unsern Vadder aach de ganze Tag nichts gegesse,
unn vor lauter Hunger ihre Schärp gefresse.
Jedenfalls sah ich ihn, beim Kaue und Kaue,
unn so dud er des Ding bis heit noch verdaue.
Denn unner de Borsch verzählt mer sich,
die Schärp kam bis heit noch net ans Tageslicht.

Lied: Uff de Merfeller Kerb um halb eins...

15 Borsch sinn mer in diesem Jahre,
doch einen herbe Verlust, den hatte mer zu beklage.
Nach 13 Joahr, machte er seiner Kerweborschkarriere ein End,
unn bekam gestern soi Ehrenschärp umgehängt.
Was er als Vadder 94 und 99 machte, des hatte Hand unn Fuß,
darum sei an dieser Stelle dem Alex Mager ein besonderer Gruß.

Lied: Schönen Gruß, und auf Wiedersehen...


Die Jugend schrie auf, unn es war beinoh jedem klar,
mir brauche bei uns des JuKuCa.
Doch aach ich hab des net verpennt,
unn waas Kulturbahnhof werds jetzt genennt.
Die ganz Sach, die iss wohl ganz schee,
im Bahnhof trifft sich net nur die Jugend bei Kultur unn Kaffee.
Doch hoffentlich gibt´s koan große Knall,
unn de Verein do, bleibt weiter am Ball.
Bis jetzt lief´s gut, es könnt schenner net soi,
unn am Kerwemondaach, kumme mer uff en Schoppe vorbei.

-PROST-

Unn gibt´s da owwe koan Schoppe, wern mers trotzdem besuche,
bei Kaffee unn em Quetschekuche.

Lied: Quetschekuche woll´n mer backe...

De Kerschgang am Sunndaach, iss fer jeden Borsch Pflicht,
iss er aach mied, unn net so ganz frisch.
Doch mir gehn gern hie, nur eins dud uns stinke,
mer derffe in de Kersch e ganz Stund nichts trinke.
Unser Pfarrerin, die iss koa Fraa fer die Küch,
ei die roppt ja in de Kanzel die allerbeste Sprüch:
„Sie hatten sich ersoffe!“
„Sie übten den aufrechten Gang!“
„Unn sie ernährten sich von Korn!“
Des warn ihre besten Brüller,
Ihr Leit geht inn die Kersch, des iss werklisch en Knüller!

Lied: Maria und Josef...
-PROST-

So, ich komm jetzt, es iss zwar net schick,
zu dem verhaßte Thema Politik.
Es iss des Thema, Woch fer Woch.
Ich maan des große Haushaltsloch.
Ich sag Eich des, was Ihr schon kennt,
unser Stadt, die iss insolvent.
Unsern Kämmerer hatte en gute Rat,
denn bei uns werd in Zukunft jetzt gespart.
Doch ich gab nichts uff des ganze Gesaier,
denn ich waas gute Rat, der iss teier.
Jetzt isses klar, es werd net viel gespart,
awwer e anner Lösung ham se schon parat.
Jetzt erhöhn se im Rathaus oifach die Gebühren,
denn mir soll´n de Gürtel noch enger jetzt schnüren.
De Kinnergarte, es Schwimmbad, mer ganz gar net fasse,
iwwerall derffe mer in Zukunft noch mer Geld lasse.
Unn trotzdem bin ich glüklich, weil ich derf lange lebe,
denn moi Grabstätt uff´m Friedhof, kann ja koaner meeh löhne.
Ich sags Eich, die im Rathaus ham en schöne Duppe,
dene müsse mer in die Suppe spucke.
Awwer des mit dem Haushaltsloch iss doch gar net so schlimm.
Ich hab da ne Lösung bei mir schon im Sinn.
Mir verkaafe Walldorf, den Ortsteil im Norden, wie jeder weiß.
Vielleicht bekommt mer dafier en gude Preis.
Unn wenn ja, dann nichts wie fort demit,
dann iss de Haushalt saniert, des wär doch de Hit.








Apropos Walldorf, da hab ich noch was zu sage.
Ein Dankeschee, an die Wallderfer Kerweborsch, dene Hare.
Die Jungs, die sinn gut druff,
sei es nüchtern odder im Suff.
Doch eins unn des find ich so schade,
Ihr habt bei Eich an de Kerb ja goa nichts zu sage.
Ich komm letzt Joahr ins Zelt, unn des war schon bleede,
sah ich die Edda Bassler bei de Kerwerede.
Da mußt ich gloi schlucke, weil ich konnt des net fasse.
Was hatt dann die Fraa uff de Lader zu schaffe?
Also bei uns Ihr Bube, und ich hoff des rafft-der,
sitzt nur oaner uff de Lader unn des bin ich de Vadder.


Spruch: Unn unsern Kerwevadder er lebe hoch...



Unn iwwerhaapt die Kerweredd bei Eich stieß mer uff bis zur Kehl.
Ei des war ja nur en Grußwort an die Herren May, Becker unn Brehl.
Unn darum sag ich ihr Leit, unn des is werklisch net schee,
die Wallderfer Kerb verkommt zum Parteitag von de SPD.



Unn noch was muß mer zu de Wallderfer Kerb sage,
weil da dun mich noch annern Sorje plage.
Ich muss Eich verkünden, in Walldorf da sinn se ganz schee schlau,
unn mache aus ihrer Nachkerb ne Gewerbeschau.
So holt mer die Wallderfer Nachkerb wirrer ausm Sarg,
mim Autosalon unn nem Vergnügungspark.
Ihr arme Wallderfer Bube, da macht- der was dorsch,
so mutiert mer vom Kerwe- zum Gewerbeborsch.
Also, Ihr Wallderfer Kerweborsch, wann se iss Eich was wert,
dann rettet se, die Wallderfer Kerb!!!









Die Politiker, ei die wern ja immer doller,
so bekam ich bei uns letzt Joahr en Koller.
Am Kerwemontagabend in de Keglerklause,
mir am feiern, unn die Musik hatt Pause.
Jedenfalls unsern Höflein, wie alle recht dicht,
stand der Kerl uffemol mim Mikro uffm Tisch.
Der gute Mann, er iss ja net hohl,
dichtete zur Melodie vom Anton aus Tirol.
Unn so ertönte dann in Perfektion,
vom Anton die Höfleinsche Version.
Unn der Kerl bekam sogar Applaus,
weil es platzte dann aus ihm heraus:

“ Ich bin so voll, ich bin so zu,
ich bin de Chef von de CDU...!!!“



Unsern Vorsitzende iss en Hooligan,
der derf net mehr ins Kulturhaus rinn.
Unn de Vorsitzende vom Kerweborschverein,
des ist de Uli Sensche, des waas hier jedes Schwein.
De Kerwebaum war letzt Joahr noch net ins Loch gesunke,
da hat de Uli e Seil in de Bücherei um en Pfoste gebunne.
Er dachte debei nur an die Sicherheit,
damit unne nichts passiert, dene Leit.
Uff de Stadt iss scheinbar so ebbes net mehr im Lot,
jetzt hat de Herr Sensche do owwe Hausverbot.
Will sich unsern Uli, jetzt e Buch ausleihe,
da fange se im Kulturhaus laut an zu schreie.
So wern se hier behandelt, die Leit mit Ehrenamt.
Ihr liewe Leit, ich muß Eich sage, des iss e Schand!


-Prost-






So, ich bin mit maaner Redd schon fast am Ende,
awwer oi Stroof du ich dem Bernhard noch schenke.
Unserne altgediente Berjermoaster hawwe all ihr Monument,
so die Bachmann-Hall unn Klingler-Stroos ein jeder kennt.
Aach beim Bernhard muss mer sich langsam maa Gedanke mache,
der Kerl werd ja aach baal mal uffhörn zu schaffe.
Gut, e Turnhall derf mer net nach ihm benenne,
weil unsern Bernhard dud Sport nur ausm Fernseh kenne.
Mir fällt de Pommerenke oi, da werd doch grad schwer geschafft.
Des werd dann de Berhard-Brehl-Gedächtnis-Platz.
Odder, unn des find ich noch besser
weil es iss doch irgendwie kesser,
mir mache ausm Vitrolles-Ring im Nu,
die „Kreisel-Bernhard-Avenue“.

Lied: Bernhard Brehl, Bernhard Brehl...

Denkt emol net an die Altagssorje,
geht liwwer feiern bis zum Morje.
Ich lad Eich all zum Feiern oi,
geht uff die Kerb denn so muß des soi.
Dann brauch´s oam um die Kerb net bange zu werde,
denn die Merfeller Kerb, die derf net sterbe.

-Prost-

Ihr liewe Leit die Redd iss aus,
schnappt Eich e Bier, die Wutz laßt raus.
Ich wünsche Eich, unn des iss keine Frage,
aach in diesem Jahr, wirrer scheene Kerwedaache.

Spruch: Unn die Merfeller Kerb sie lebe hoch...


Die Merfeller Kerb, Ihr liewe Leit,
die beginnt jetzt, hier, unn heit.

Drum singe mer, unn des iss kloar:


„Die Merfeller Kerb is do...!“


Merfeller Kerweborsch 2003




Kerwevadder: Sebastian „Eichhörnsche“ Cornels


Beivadder: Sascha „Lumbi“ Riess




Stefan „Ernscht“ Ernst
Andreas „Gerdi“ Gehrke
Thorsten „Hobby-Stoiber“ Höflein
Marco „Kossi“ Kossmann
Christoph Lorenz
Tim Lupus
David „Knäggi“ Mallock (Fahneträscher 2003)
Matthias Rabe
Holger „Tufte“ Sandner
Arne Schmitt
Stefan „Poe“ Stowitschek
Michael Wenzel
Marco „Löti“ Zylla


Die aktiven Kerweborsch bedanken sich bei allen,
die zum Gelingen
der Merfeller Kerb 2003 beigetragen haben.

[Zurück zur Übersicht]